ನವದೆಹಲಿ: ದೇಶದ ಡಿಜಿಟಲ್ ಲೋಕದಲ್ಲಿ ಅಶ್ಲೀಲ ಮತ್ತು ಅಸಭ್ಯ ವಿಷಯಗಳನ್ನು ಪ್ರಸಾರ ಮಾಡುತ್ತಿದ್ದ 25 ಒಟಿಟಿ (OTT) ವೇದಿಕೆಗಳ ಮೇಲೆ ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಸಚಿವಾಲಯವು ಭಾರಿ ಕ್ರಮ ಜರುಗಿಸಿದೆ. ಸಾರ್ವಜನಿಕ ನೈತಿಕತೆ ಮತ್ತು ಸಭ್ಯತೆಯನ್ನು ಉಲ್ಲಂಘಿಸಿದ ಹಿನ್ನೆಲೆಯಲ್ಲಿ ಈ ಎಲ್ಲಾ ಅಪ್ಲಿಕೇಶನ್ಗಳು ಮತ್ತು ವೆಬ್ಸೈಟ್ಗಳನ್ನು ತಕ್ಷಣದಿಂದ ಜಾರಿಗೆ ಬರುವಂತೆ ನಿಷೇಧಿಸಲಾಗಿದೆ.
ಈ ಒಟಿಟಿ ವೇದಿಕೆಗಳು ತಮ್ಮ ಸರಣಿಗಳಲ್ಲಿ (Web Series) ಅತಿರೇಕದ ಅಶ್ಲೀಲತೆ, ಮಹಿಳೆಯರನ್ನು ಕೀಳಾಗಿ ಚಿತ್ರಿಸುವುದು ಮತ್ತು ಸಮಾಜದ ಮೇಲೆ ಕೆಟ್ಟ ಪ್ರಭಾವ ಬೀರುವ ದೃಶ್ಯಗಳನ್ನು ಪ್ರಸಾರ ಮಾಡುತ್ತಿದ್ದವು ಎಂಬ ಆರೋಪ ಕೇಳಿಬಂದಿತ್ತು. ಈ ಹಿನ್ನೆಲೆ ಮಾಹಿತಿ ತಂತ್ರಜ್ಞಾನ ಕಾಯ್ದೆ (IT Act, 2000) ಅಡಿಯಲ್ಲಿ ನೀಡಲಾದ ಅಧಿಕಾರವನ್ನು ಬಳಸಿ ಸರ್ಕಾರವು ಈ ಕ್ರಮ ಕೈಗೊಂಡಿದೆ. ಪದೇ ಪದೇ ಎಚ್ಚರಿಕೆ ನೀಡಿದರೂ ವಿಷಯದ ಗುಣಮಟ್ಟದಲ್ಲಿ ಬದಲಾವಣೆ ಮಾಡದ ಕಾರಣ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ.
ಸೋಶಿಯಲ್ ಮೀಡಿಯಾ ಲಿಂಕ್ಗಳೂ ಬಂದ್: ಈ ವೇದಿಕೆಗಳಿಗೆ ಸಂಬಂಧಿಸಿದ ಸಾಮಾಜಿಕ ಜಾಲತಾಣಗಳ ಖಾತೆಗಳು (Facebook, Instagram, X) ಮತ್ತು ಯೂಟ್ಯೂಬ್ ಚಾನೆಲ್ಗಳನ್ನು ಸಹ ನಿರ್ಬಂಧಿಸಲು ಆದೇಶಿಸಲಾಗಿದೆ.
ಯಾವೆಲ್ಲಾ ವೇದಿಕೆಗಳು ನಿಷೇಧದ ಪಟ್ಟಿಯಲ್ಲಿವೆ?
ಸರ್ಕಾರವು ಬಿಡುಗಡೆ ಮಾಡಿದ ಪಟ್ಟಿಯಲ್ಲಿ ಪ್ರಮುಖವಾಗಿ ಆಲ್ಟ್ ಬಾಲಾಜಿ(ಎಎಲ್ಟಿಟಿ), ಉಲ್ಲು, ಬಿಗ್ ಶಾಟ್ಸ್ ಆ್ಯಪ್, ದೇಸಿಫ್ಲಿಕ್ಸ್, ಬೂಮೆಕ್ಸ್, ನಿಯೋನ್ಎಕ್ಸ್ ವಿಐಪಿ, ನವರಸ ಲೈಟ್, ಗುಲಾಬ್ ಆ್ಯಪ್, ಕಂಗನ್ ಆ್ಯಪ್, ಬುಲ್ ಆ್ಯಪ್, ಶೋಹಿ ಸೇರಿದಂತೆ ಒಟ್ಟು 25 ಅಪ್ಲಿಕೇಶನ್ಗಳಿವೆ. ಇವುಗಳಲ್ಲಿ ಹೆಚ್ಚಿನವು ಸಣ್ಣ ಹೂಡಿಕೆಯ ಪ್ಲಾಟ್ಫಾರ್ಮ್ಗಳಾಗಿದ್ದು, ಕೇವಲ ಅಶ್ಲೀಲ ದೃಶ್ಯಗಳನ್ನೇ ಆಧರಿಸಿ ಚಂದಾದಾರರನ್ನು ಸೆಳೆಯುತ್ತಿದ್ದವು.
ಕೇಂದ್ರ ಸರ್ಕಾರದ ಎಚ್ಚರಿಕೆ:
“ಸೃಜನಶೀಲತೆಯ ಹೆಸರಿನಲ್ಲಿ ಅಶ್ಲೀಲತೆಯನ್ನು ಪ್ರಸಾರ ಮಾಡಲು ಅವಕಾಶವಿಲ್ಲ. ಯುವ ಪೀಳಿಗೆಯ ಮೇಲೆ ತಪ್ಪು ಪ್ರಭಾವ ಬೀರುವ ಇಂತಹ ವೇದಿಕೆಗಳ ವಿರುದ್ಧ ಮುಂದಿನ ದಿನಗಳಲ್ಲೂ ಕಠಿಣ ಕ್ರಮ ಮುಂದುವರಿಯಲಿದೆ” ಎಂದು ಮಾಹಿತಿ ಮತ್ತು ಪ್ರಸಾರ ಸಚಿವಾಲಯ ಸ್ಪಷ್ಟಪಡಿಸಿದೆ.
