ನ್ಯೂಸ್ ಬ್ಯೂರೋ: ಪೆಸಿಫಿಕ್ ಮಹಾಸಾಗರದಲ್ಲಿ ಡ್ರಗ್ಸ್ ಸಾಗಣಿಕೆಯಲ್ಲಿ ತೊಡಗಿದ್ದ ಶಂಕಿತ ಹಡಗಿನ ಮೇಲೆ ಅಮೇರಿಕಾ ಸೇನೆ ಶುಕ್ರವಾರ ರಾತ್ರಿ ದಾಳಿ ನಡೆಸಿದ್ದು, ಈ ದಾಳಿಯಲ್ಲಿ ಇಬ್ಬರು ಸಾವನ್ನಪ್ಪಿ ಓರ್ವನನ್ನು ರಕ್ಷಿಸಲಾಗಿದೆ ಎಂದು ಅಮೇರಿಕಾದ ದಕ್ಷಿಣ ಕಮಾಂಡೆಂಟ್ ಮಾಹಿತಿ ನೀಡಿದೆ.
ಜನವರಿ 23ರಂದು ರಕ್ಷಣಾ ಕಾರ್ಯದರ್ಶಿ ಪೀಟ್ ಹೆಗ್ಸೆತ್ ಅವರ ಸೂಚನೆಯ ಮೇರೆಗೆ ಜಾಯಿಂಟ್ ಟಾಸ್ಕ್ ಫೋರ್ಸ್–ಸಧರ್ನ್ ಸ್ಪಿಯರ್ ಈ ದಾಳಿ ನಡೆಸಿದೆ ಎಂದು ದಕ್ಷಿಣ ಕಮಾಂಡ್ X ನಲ್ಲಿ ಪ್ರಕಟಿಸಿದೆ. ರಕ್ಷಿಸಲ್ಪಟ್ಟ ವ್ಯಕ್ತಿಗಾಗಿ ಕರಾವಳಿ ರಕ್ಷಕ ಪಡೆಯು ಶೋಧ–ರಕ್ಷಣಾ ಕಾರ್ಯಾಚರಣೆ ಮುಂದುವರೆಸಿದೆ.
ಈ ದಾಳಿಯೊಂದಿಗೆ, ಆಪರೇಷನ್ ಸಧರ್ನ್ ಸ್ಪಿಯರ್ ಎಂಬ ಹೆಸರಿನಡಿ ಡ್ರಗ್ ಸಾಗಾಣಿಕೆ ನೌಕೆಗಳ ಮೇಲೆ ಅಮೆರಿಕಾ ನಡೆಸಿದ ದಾಳಿಗಳಲ್ಲಿ ಸಾವನ್ನಪ್ಪಿದವರ ಸಂಖ್ಯೆ ಈಗ 117ಕ್ಕೆ ಏರಿದೆ. ಈ ಕಾರ್ಯಾಚರಣೆ ಮಾದಕ ವಸ್ತು ವ್ಯಾಪಾರವನ್ನು ತಡೆಯುವುದೇ ಉದ್ದೇಶವೆಂದು ಟ್ರಂಪ್ ಆಡಳಿತ ಹೇಳಿದ್ದರೂ, ಒಳಗಟ್ಟೆಯಲ್ಲಿ ವೆನೆಜುವೆಲಾ ನಾಯಕ ನಿಕೋಲಾಸ್ ಮದುರೋ ಮೇಲಿನ ಒತ್ತಡವನ್ನೂ ಹೆಚ್ಚಿಸಲು ಇದು ಬಳಸಲ್ಪಟ್ಟಿದ್ದ ಆರೋಪಗಳು ಇವೆ.
ಇದೇ ಮೊದಲ ಬಾರಿಗೆ, ಮದುರೋ ಅವರನ್ನು ಕರಾಕಸ್ನಿಂದ ಬಂಧಿಸಿ ನ್ಯೂಯಾರ್ಕ್ಗೆ ಕೊಂಡೊಯ್ದ ನಂತರ ಡ್ರಗ್ ದೋಣಿಗಳ ಮೇಲೆ ನಡೆಯುತ್ತಿರುವ ಅಮೆರಿಕಾ ದಾಳಿ ಘಟನೆಯಿದು. ಮದುರೋ ಈ ತಿಂಗಳ ಆರಂಭದಲ್ಲಿ ನ್ಯಾಯಾಲಯದಲ್ಲಿ ತನ್ನ ಮೇಲೆ ಹೊರಿಸಿದ ಆರೋಪಗಳಿಗೆ ದೋಷಿಯಲ್ಲವೆಂದು ಹೇಳಿಕೊಂಡಿದ್ದರು.
ಹಿಂದಿನ ಹಲವು ಸಮುದ್ರ ದಾಳಿಗಳಲ್ಲಿಯೂ ಕೆಲವರು ಬದುಕುಳಿದಿದ್ದಾರೆ. ಕಳೆದ ಡಿಸೆಂಬರ್ 30ರಂದು ನಡೆದ ದಾಳಿಯಲ್ಲಿ ದೋಣಿಯಿಂದ ಅನೇಕರು ನೀರಿಗೆ ಜಿಗಿದರೂ, ಮೂರು ದಿನಗಳ ನಂತರ ಕರಾವಳಿ ರಕ್ಷಕ ಪಡೆ ಶೋಧ ರದ್ದುಪಡಿಸಿತ್ತು. ಕಳೆದ ಅಕ್ಟೋಬರ್ನಲ್ಲಿ ಕರಿಬಿಯನ್ ಪ್ರದೇಶದಲ್ಲಿ ನಡೆದ ದಾಳಿಯಲ್ಲಿ ಇಬ್ಬರನ್ನು ಅಮೆರಿಕಾ ರಕ್ಷಿಸಿ ಇಕ್ವಡಾರ್ ಮತ್ತು ಕೊಲಂಬಿಯಾಕ್ಕೆ ಹಿಂತಿರುಗಿಸಿತ್ತು.
ಸೆಪ್ಟೆಂಬರ್ 2ರಂದು ನಡೆದ ಮೊದಲ ವಿವಾದಾತ್ಮಕ ದಾಳಿಯಲ್ಲಿ ದೋಣಿ ಮುಳುಗದಿದ್ದರಿಂದ, ಎರಡನೇ ಮಿಸೈಲ್ ದಾಳಿ ನಡೆಸಲಾಗಿತ್ತು. ಇದರಲ್ಲಿ ದೋಣಿಯ ಅವಶೇಷಗಳಿಗೆ ಅಂಟಿಕೊಂಡಿದ್ದ ಇಬ್ಬರು ಮೃತಪಟ್ಟಿದ್ದರು. ಈ ‘ಡಬಲ್–ಟ್ಯಾಪ್’ ದಾಳಿಯ ಬಗ್ಗೆ ಸಾಕ್ಷ್ಯಾವಳಿ ಬಿಡುಗಡೆ ಮಾಡಲು ಕಾಂಗ್ರೆಸ್ನ ಡೆಮಾಕ್ರ್ಯಾಟ್ ಸದಸ್ಯರು ಒತ್ತಾಯಿಸುತ್ತಿದ್ದಾರೆ.
